Mojokerto – Ramene kasus penangkapan oknum sing ngaku wartawan inisial Amir karo Unit Resmob Polres Mojokerto saiki dadi omongan nang endi-endi. Akeh sing langsung nyebut iki kriminalisasi pers, padahal durung mesthi ngono.
Pendiri Media Group Globalindo, Teguh Puji Wahono, S.Psi., S.H., M.H., langsung angkat suara. Dheweke negesno nek masyarakat kudu iso mbedakno antarane profesi wartawan karo tumindak pribadine wong.
“Awak dhewe kudu iso mbedakno antarane profesi wartawan karo tumindak pribadine wong. Nek aparat tumindak adhedhasar laporan lan prosedur hukum, kuwi jenenge penegakan hukum, dudu kriminalisasi pers,” tegasé.
Menurut Teguh, nang Indonesia iki ora ono sing kebal hukum. Senajan ngaku wartawan, nek ketangkep nduwe dugaan pidana yo tetep kudu diproses.
UU Nomor 40 Tahun 1999 pancen njamin kebebasan pers, tapi kuwi mung kanggo kegiatan jurnalistik sing sah, dudu kanggo nutupi tumindak sing nyimpang.
Nek tenan ono dugaan pemerasan, kuwi iso kena Pasal 368 KUHP, ancamane nganti 9 taun penjara. Nek ono sing melu-melu, yo iso keseret Pasal 55 KUHP.
“Ojo sampek profesi wartawan digawe tameng kanggo tumindak sing nglanggar hukum. Nek kuwi kelakon, sing rusak ora mung wongé, nanging yo jeneng apik profesi pers,” ujare.
Teguh yo ndhukung langkah Polres Mojokerto sing wis nanggapi laporan masyarakat.
“Nek ono masyarakat sing kroso dirugikno lan lapor, aparat wajib nglakoni proses. Kuwi wis dadi mandat hukum, dudu tumindak sakarepe dewe,” jelasé.
Dheweke ngélingno masyarakat, ojo kesusu nggawe kesimpulan sadurunge proses hukum rampung lan kabeh fakta kebukak.
“Kudu tegas, nek ono oknum wartawan sing nyalahgunakno profesine kanggo nekan utawa meres wong liya, kuwi ora ono hubungane karo kebebasan pers,” tegasé maneh.
Minangka penutup, Teguh ngajak kabeh awak media supaya tetep njaga integritas lan ora ngeculno profesi wartawan dadi alat kepentingan pribadi.
“Hukum kudu dadi panglima. Kebenaran kuwi dudu saka opini, nanging saka fakta lan proses hukum sing objektif,” pungkasé.
Saiki masyarakat lagi nunggu kejelasan proses hukum nang Polres Mojokerto, kanthi harapan kabeh fakta iso kebukak kanthi terang.
Mlaku-mlaku nang Tunjungan,
mampir sek ngombe es degan.
Wartawan kuwi tugasé nggowo kebenaran,
dudu gawe tekanan kanggo golek bayaran.
